2007年9月27日

C+偵探－彭氏兄弟最好個部，故事真係幾懸疑，而且有時仲幾嚇人，有D 希治閣feel,

雖然有些觀眾話估唔到個ending，但我就估到．如果佢單純是偵探片，我才估不到啦．

最驚喜，係見到一班電視演員黎耀祥，商天娥，廖啟智等好戲之人，可惜祥仔同娥戲份唔多，有點浪費，請好戲之人，就要畀機會佢地發揮，智叔就真係好勁，郭富城恰如其份，但我唔鍾意佢既食相，誇左D，唔通男士真係要咁食野．

色．戒－真的不錯，場面處理，劇情舖排，演員都好正，有幾幕好喜歡．第一，是在日本酒館，王佳芝唱“天涯歌女”，易先拭淚，我好感動，我唔知導演真正想表達什麼，但我自己的感受是，有兩點－一是 易 先生是漢奸，好孤獨，好怕人殺佢，而竟然有位紅顏知己，願意愛自己及共患難，因佢未知王佳芝是有目的，王佳芝表現出來亦是好似想跟易生〔生死與共〕．

而另一點，王佳芝唱小調，勾起易生對祖國情懷，易生的理念是，當上漢奸，只為了生存．他還是懷念國家的一切，可惜，他已是被國人追殺的對象，漢奸走狗，已沒有多大的機會可以在中國的酒館內，聽中國小調，湯唯一唱，有所感觸，感懷身世．

另外，我好喜歡買戒指的場面，浪漫而痛苦，去到天堂一刻便變成了地獄，王佳芝本來好幸福， 易 先生那麼愛她，六卡鑽戒，以當時的社會，真是珍貴．王佳芝感受到易生的愛，還叫他“快就”，易生與王佳芝的表情變化，由開心變成痛苦，演員演出非常細緻．

易生速逃真係爆笑，偉仔身手好，一躍跳入車內．根據我有個在當日做臨時演員既朋友講，偉仔一take過，當場掌聲雷動，有咁手身，佩服！

偉仔今次真係陰沉，奸，演出好過“傷城”，第一次見到佢可以去到咁奸，可惜佔戲唔多．有點失望

我覺得“色．戒”有問題既地方：

接近尾聲，易生既助手說一早知道王佳芝有問題，其實是學生．．．．．

易生動怒，點解唔一早講，我都唔明白佢助手做乜，知道王佳芝有問題，仲可以畀佢埋自己老闆身，真係白痴．

估唔到，湯唯真係好出色，演得好好，我都當左佢係王佳芝，但當她初見 易 先生，她不是太緊張，好似唔正常，一個業餘既特務，普通學生去殺漢奸，點解可以咁冷靜，其他男同學都表現得好緊張．

導演有無想過呢點？

易先生，得 易 先生只講自己盤問人，有幾殘忍，但沒有拍出來（可能係剪左），我覺得如果加番 易 先生折磨人．盤問人的片段，更能夠突顯 易 先生的陰暗面，同埋佢對別人的殘忍，佢對王佳芝的愛及好，會有更大的對比．不過，李安的心是跟著王佳芝走，所以可能要自己騙自己，睇唔到易生的壞，只想看到 易 先生的好．