2009年12月12日 電影<風雲>2

等左十幾年, 終於睇到<風雲>2. 我唔係漫畫迷, 但十幾年前, 睇左<風雲>, 聽左個廣播劇, 對<風雲>既故事都幾有興趣.  後來都睇左內地電視劇<風雲.>. 可能, 先入為主, 我真係覺得伊健好似聶風, 郭富城好似步驚雲.  

<風雲>2 , 可以講係無乜劇情. CG特技場面真係好震撼. 但故事無前無後, 當看見聶風第一句跟第二夢說的話是:"我們終於見面", 真係O哂嘴. 前面都沒有任何交代. 如果唔係睇左雜誌, 及電視的電影廣告雜誌, 又或者無睇過<風雲>漫畫, 你真係完全唔知 人物既關係, 更加唔會感動.睇外國套<龍珠>, 已經覺得好唔得, 但都仲有D劇情. 彭氏兄弟, 請下次再拍改編漫畫既電影, 一定有D劇情, 要有D人物描寫.

其實我等左十幾年, 都係想睇聶風入魔乍. 話說N年前, 買了"蜀山之仙侶奇緣"VCD, 睇到伊健演既石生, 入魔. 我覺得如果佢再演聶風入魔, 應該會更好睇. 今次睇佢入魔, 殺了楚楚, 咧嘴一笑, 那個陰險既笑容, 掌握到神髓. 

鄭伊健是一名可塑性甚高的演員. 他很多電影, 我都會入戲院睇, 但他好多電影, 睇完都唔會記得. 我等緊佢的突破. 希望佢能夠遇到一個有發揮機會的劇本.<古惑仔>令鄭伊健在電影界走紅, 我都睇足七部<古惑仔>, 但他的演戲潛力, 不只局限於此. 在<三岔口>, 我覺得佢演得好過郭富城, 雖然羅嘉良仲好過佢兩個. 另外, <第一誡>, 我想是片種問題, 所以伊健只可以在韓國富川影展當影帝. 其實, 佢演既黃SIR, 好正架.  所謂"正", 唔係帥. 黃SIR是有點胖, 做警察好似意興闌珊, 其實好有HEART,  常帶點醉意, 但眾人皆醉, 我獨醒的模樣.  佢同車婉婉那場TANGO, 都好精彩.  好少見鄭伊健, 做呢類角色,都是一個突破.  他內在演戲潛力不少, 有待發揮.

在鄭伊健演的電影之中, 有兩句對白, 我好記得, 亦會常提醒自己.

<風雲>  : 聶風阻止步驚雲殺雄霸: "凡事去得太盡 , 緣份誓必早盡."

<天行者> : 葉秋: "還別人心願, 如還自己心願."